Plant Basil, oes ‘n duif..

Ek sukkel letterlik jare om goed te groei, my groen vingers het verdwyn vandat ek hier in die woestyn bly. Sommer net so, tjoef, toe is dit weg. So paar weke gelede koop ek plantjie want wil basil “juice” en gebruik al die blare. Net sommer oor ek lus is vir geld mors koop ek ‘n blomoptjie met piering onder en besluit vandag druk ek daai basil net so in en sit hom op die vensterbank. Dis nou winter hier, so jou hand skroei nie af as jy die venster oopmaak nie.

Ek gee elke dag half koppie water soos op die instruksies staan . Dis nog donker daai tyd wanneer ek gou venster oopmaak en water gee so voor werk. En om een of ander rede, groei daai plant te wonderlik. Ek kom so paar dae terug by die huis en sien al die takkies in die plant, maar ek is so excited dat ek tyd het om nog ‘n episode van “Sons of Anarghy ” te kyk dat ek dit los. Volgende dag hier is die takkies in die vuilgoed sak en ek vra vir Padda “Wat se takkies is die?” Sy skud haar kop en sê “Ek weet nie Pikkewyn, ek sien net al die goed in Basil en dit uitgehaal, hy groei dan nou so mooi.” Nie een van ons twee dink enigsins verder nie.

En so kom ek by die huis en hier sit die mooiste duifie in die basil plant, lekker gemaklik en ek weet onmiddelik, hulle maak nes! Ek is so excited, kan nie ophou praat toe Padda by die huis kom nie. Ek gaan omtrent aan, haar oë staan sommer stokstyf in haar kop soos ek aanhou tjoek. Ek sê loer hier, maar moet hulle nie skrikmaak nie, hulle maak nes. En al wat sy wonder is hoe gaan ons Basil water gee as hulle nou nes maak.

Twee dae later daar is die eiertjie, net een. Nogal vreemd, hulle lê blykbaar 2 (dankie Google) en die vat so omtrent 14 dae om uit te broei. En net daar gaan ek aan die panic. Hoe gaan hierdie nuwe duiwe-kind ooit leer vlieg van die vierde vloer af? Ons kan nie help nie, ons kan niks doen nie. Te laat om nou voël huisie te gaan koop want raak aan daai eiertjie is hulle is weg. So, moral of the story, ons het Basil gegroei en nou gaan ons ‘n duif oes.